Ich Hanns der Gallenroder Burger zu Wienn. Bechenn offen-leich mit dem brief. Umb die drithalb phunt Wienner phenning gelts purckrechts die ich auf meinem halben haus gelegen in der Sche(ff) strass zu Wienn zenechst dem haus das weilent Hannsen des kaufmans gewesen ist verchauft han. Ludweygen Hainreichs seligen des Satler von Nuernberg Suen und seinen erben nach des briefs sag den ich In darumb geben han . hab ich mich mit meinen trewn angeverd gegen In des verlubt und verpunden was in der Egenanten gult an dem vorgenanten meinem halben haus abget das sullen Si haben auf allem anderm meinem guet . das ich han in dem lande zu Osterreich oder wa ich es hab ich sey lebentig oder tod . und daruber zuen ainem warn offem urchund Gib ich In den brief ver-sigelten mit meinem Insigel und mit des erbern mann Insigel Hannsen des Geroltstenner dietzeit des Rats der Stat zu Wienn den ich des gebeten han das er der sach getzeug ist mit seinem Insigel Im an schaden. Geben zu Wienn nach krists gepuerd viertzehenhundert jar darnach in dem fuent-zehenden jar an sand Lamprechts Abend.

Source Fulltext: Peter Peusquens