Ich Haynreich der Ratgeb und Ich Elzbeth sein hausvrow. Ich Nyclas und Fridreich sein sune und Ich Kathrey und Chunigunt sein Thochter vergehen allen den die disen prief lesent oder horent lesen die Nu lebent oder hernach chunftig sein daz wir mit unserr Erben guten willen und gunst mit verdachtem Muet ze der zeit da wir ez wol getun mochten und mit unserr Gruntvrowen hant vron Kathreyn ze den zeiten aptessin ze sand Nyclas ze Wienn recht und redleich verchauft haben dem Erbern Manne Chunraden dem Wiltwercher purger ze Wienn und vron Mergarten seiner hausvrowen und irn Erben ein paumgarten der da leit zwizzen Otten dez schreiber und Hainreichz dez Mauter paumgarten da von man alle iar dient der vorgenanten vron Kathreyn der aptessin und irem chloster dreizzig phenninge ze Gruntrecht an sand Michels tag und nicht mer. um Neunthalb phunt wienner phenning der gantz und gar gewert sein. und sey auch wir mit sampt unsern Erben dez selben paumgarten ir rechter gewer und scherm fuer allen irsal und ansprache und wan wir selbe nicht ingesigel haben so geb wir in disen prief versigelt mit der Erbern vorgenanten vrowen Kathreyn ingesigel aptessin ze sand Nyclas die wir darum gepeten haben. Diser prief ist gebennach Christez purth dreutzehen hundert iar darnach in dem Neun und dreizzigisten iar an dem pericht abent.

Source Fulltext: Peter Peusquens