Ich Hanns Zingk des hochgeborn fuersten, hertzog Albrechts hertzogen ze Osterreich etc. meins genaedigen herren Anwalt in dem Rat der Stat ze Wienn Enpeut dem erbern weysen Hainreichen dem Haekchl burgêr ze der Newnstat mein dienst. Als ich in den sachen zu Richter gesatzt bin, und ew vormals zwier an stat ewrs Suns Lienharts des Haekchl sêligen geladen hab, auf heutigen tag ze verantwurten gegen dem erbern Thoman von weitra der Stat ze wienn kamrêr, der da in namen und an stat derselben Stat ze wienn gechlagt hat, wie ain haws gelegen an dem kyen-markcht, das man nennet des Rueschleins haws, welches von prunst wegen Pawlos lêge, lengêr denn recht taeg, und darumb wêr dasselb haws, der vorgenanten Stat, als Irem rechten Grunt-herren vervallen, nach Innhaltung der briven, die von fuerstlicher macht, umb solich Recht der vorgenanten Stat gegeben sind, und aber Ier noch nyemant anderer von desselben ewrs Suns wegen fuerchoemen ist, solich klag ze verantwuerten. Davon mainet Ir noch darynn icht widerred ze haben, das Ir dann von hewt ueber Sechs wochen, her gen wienn in den Rat fuer mich körmbt, da wil ich ew gegeneinander verhoern, und yedem tail lassen widervarn was Recht ist. Chaembt abêr Ir oder yemand anderer, der das vorgenante haws verantwurtet, auf denselben tag nicht fuer So wird dannach erchant was Recht wêr, und ist das die dritt ladung. Geben ze wienn an phintztag nach des heyligen Chrewtz tag, als es funden ist, Nach kristi gepuerd in dem viertzehenhunder-tistem und Sibentzehendem jar.

Source Fulltext: Peter Peusquens