Ich Nichlas der Symaeninne sun . und ich Chunigunt sein hausvrowe . Wir vergehen und tuen chunt allen den die disen brief lesent oder hoerent lesen die nu lebent und hernach chunftich sint , daz wir mit unser erben gueten willen und gunst mit verdachtem muet und mit gesampter hant zue der zeit do wir iz wol getuen mochten und mit unsers Gruntherren hant . des erbern Ritter hern Jansen dem Greyffen . verchauft haben unser haus daz da leit zwischen des Schaeuchen padstub . und hern Pilgreims haus des Mundoffen da man alle iar von dient . hern Jansen dem Greyffen sechs phenninge ze rechtem Gruntrecht und den gaestleichen vrowen datz sant Jacob ze wienne ain phunt . und den gaestleichen vrowen datz sant Laurentzen fumftzich phenninge wiener muenzze ze Purchrecht und niht mer . Daz vorgenante haus haben wir recht und redleich verchauft und geben mit allem dem nutz und recht alz wir ez in Gruntrechtes und Purchrechtes gewer her pracht haben . umb hundert phunt und umb achtzich phunt und umb ain phunt wienner phenninge der wir gar und gaentzleich gewert sein . dem erbern manne hern Chunraden dem Wiltwaericher zu den zeiten Purgermaister ze wienne und seiner hausvrowen vron Mergarten und allen irn erben . fuerbaz ledichleich und vreileich ze haben und allen irn frumen da mit ze schaffen verchauffen versetzen und geben swem si wellen an allen irresal . und sein auch wir ich vorgenanter Nichlas und ich Chunigunt sein hausvrowe und unser erben unverschaidenleich , des egenanten haus . hern Chunrats des Wiltwaericher . und seiner hausvrowen vron Mergarten und irr erben recht gewern und scherm fuer alle ansprach alz Gruntrechtes und Purchrechtes recht ist und der stat recht ze wienne . waer aber daz si mit recht an dem selben haus dehainen chrieg oder ansprach gewunnen . swaz si des schaden nement . daz suln wir in alles aus richten und wider chern an alle ir mue und an allen irn schaden . und suln auch si daz haben auf uns und auf allem unserm guet daz wir haben in dem Lande ze Oesterreich wir sein lebentich oder tode. Und daz diser chauf fuerbaz also staet und unzerbrochen beleibe . dar umb so geben wir in disen brief zu einem warn urchunde und zu einer ewigen vestnunge . diser sache versigilt mit unserm Insigil. und mit unsers Gruntherren Insigil hern Jansen des Greyffen . und mit hern Hainreichs Insigil des Langen die diser sache gezeuge sint mit irn Insigiln . Diser brief ist geben ze wienne nach Christes gepurt dreuzehen hundert iar dar nach in dem viertzgisten iar des naechsten Phintztages vor sant Mathyas Tage.

Source Fulltext: Peter Peusquens