Ich pruder Sygmund Ragmung (Ramung) lant Comentewr dewtschen herren Ordens in Osterreich und ich bruder Casparr Muertzêr hawsComenteur dewtschherren Ordens des hawses ze Wienn und wir die pruederschafft gemaynn daselbs vergehen fur uns und all unser nachkoemen und Tuen kund offenleich mit dem brieff allen laewten gegenbuertigen und kuenftigen das wir mit guetem willen mit wolbedachtem muet und mit veraintem Rat zu der zeit da wir es wol getuen mochten verchawfft haben unsers rechten freynn aygens unser haws gelegen hunder sand pangrêtzen ge-nant das daewths haws Das vorgenant haws haben wir mit allen den eren nuetzen und Rechten als wir das unversprochenleich in aigens gewer ingehabt und herbracht haben und da mit es dann von alter herkoemen ist Recht und Redleich verkawfft und geben umb funff und Sechtzig phunt wien-ner phenning der wir gantz und gar verricht und gebert sein dem erbêrn Hannsen dem Pêestorffêr buerger zu Wienn und frawnn Kathrein seiner hawsfrawnn fuerbas ledichleich und freyleich ze haben und allen iren frumen damit ze schaffen mit verkawffen mit versetzen schaffen machen und geben wem Sew welln und alles damit hanndeln und tuen das In aler pesst fuegt und woll-gevelt an unser unserr nachkomen und menichleichs von unsern wegen Irrung und hindernuezz ungeverleich und sein auch wir obgenante Ich brueder Sygmund Ramung lantComentewr und ich brueder Casparr hawsComentewr mit sambt allen unsern Nachkomen des vorgenanten hawses mit seiner zuegehoerung des egenanten Hannsen Pêestorffer frawnn Kathrein seiner hawsfrawnn Recht gewern und scherm fuer alle ansprch als kauffs freys aygens und des lanndes ze Oesterreich Recht ist Ging In aber mit recht daran icht ab oder stuend In icht krieg oder ansprach daran auff von wem das wêr mit Recht was sy das schadenn nement das schullen und wellen wir In gentz-leich ausrichten und widerkeren an alle widerrêd und schullen Sy das haben daz uns unsern nachkomen und dem vorgenanten unserm haws und auff allem unserm guet das zu demselbm unserm haws gehoeret nichts ausgenamen das wir haben in dem lannde ze Oesterreich oder wo wir es haben Und das der kauff fuerbas also stêt und untzebrochen beleyb, des zu ainem waren Offenn Urkund geben wir fuer uns und all unser nachkomen, dem Obgenanten Hansen Pêestorffer frawnn Kathrein seiner hawsfrawnn den brieff, besiglt mit mein obgenants brueder Sygmundts des Ramung lanntComentewr anhangundem ambt Insigl und mit des obgenanten dawteschen hawses anhangunden Insigl Geben ze Wyenn an Erichtag nach sand Andres tag Nach Kristi gepuerd viert-zehenhundert und In dem zway und zwayntzigisten Jare.

Source Fulltext: Peter Peusquens