Ich Maister Peter der Dekhinger Techant datz aller heiligen Tuombkirchen zu sand Stephan ze Wienn und lerêr geistleicher Recht Bekenn fuer mich und mein erben und tuen kund offenleich mit dem brief von des hauss wegen gelegen an dem Egk in der Sunigerstrass ze Wienn zenêgst weilent Paulen seligen des Glaser haus, gegen dem freithoftor uber, daz mir weilent die erber fraw, Elsbet mein liebe mueter, Andres des Dekhinger seligen witib, den baiden Got gnad, mit andern guetern geschafft hat nach lautt des geschefftbriefs darumb gegeben, und wan aber mich die erbern weisen..der Burgermaister, und der Rat der Stat ze Wienn desselben haus auf das egenant geschefft durch meiner fleissigen gebet willen, In Ir gruntpuech nuetz und gewer gesatzt und darumb ingeschriben habent, und darumb hab Ich mich durch williger danckperkait, gen den egenanten erbern weisen..dem Burgermaister und dem Rat der Stat ze Wienn und gen Irn Nach-komen bey meiner wirdikait verlubt, und verpunden, wissentleich mit dem brief Also daz Ich von dem egenanten haus und von anderm meinem hab, davon mir pilleich mitzeleiden pueret mit der egenanten Stat mitleiden sol und wil an alle widerred ungeverleich, Ich gelob auch, daz Ich das vorgenant haus nyemant verkauffen, verschaffen, noch verkuemêrn sol, noch wil, denn nur solhen lêuten, die mit der Stat leiden als ander mitbuerger ze Wienn, gewondleichen tuent, und ob ich das uberfuere So sol das egenant haus der Stat gantz vervallen sein an alle genad und darueber zu einem waren urkund gib ich den brief besigelten mit meinem anhangundem Insigel, dartzu hab ich fleissicleichen gebeten den erbern Ulreichen den Gundloch dietzeit muenssmaister in Oesterreich und des Rats der vorgenanten Stat daz er der sach zeug ist mit seinem anhangundem Insigel Im an schaden Geben ze Wienn an phintztag nach sand Giligen tag Nach Kristi gepuerd viertzehen-hundert Jar darnach in dem drewundzwaintzigistem Jare.

Source Fulltext: Peter Peusquens