Ich Hanns der Scharffenperger dietzeit des Rats der Stat ze wienn Vergich fuer mich und all mein erben und tuen kund offenleich mit dem brief allen leuten gegenwurtigen und kuenftigen daz Ich mit guetem willen und wolbedachtem muete zu der zeit da ich es wol getun mocht und mit handen der erbern weisen Kunrats des Holtzler zu den zeiten Burgermaister und des Rats gemain der Stat ze wienn Recht und Redleich verkaufft hab achthalbsunddreissig phunt wienner phenning gelts purkrechts auf der uberteurung meins hauss gelegen an dem Hohenmarkcht ze wienn in dem winkchel hinder der Schrann genant weilent der Netzeuger haus uber die drewhundert phunt wienner phenning dafur es Eemaln Dorothen Erharts des Haidens in der Newnstat hausfrawn versatzt ist, und auf meinem zuhaus gelegen daneben und an dem andern tail zenagst dem Ryemhaus dem erbern Briester hern Ulreichen weilent Mertten des wachsgiesser seligen Bruder zu den zeiten kapplan und verweser der Ewigen mess die Lienhart der Schawr weilent Official des Pistumbs ze Passaw auf sant Lienharts Altar in unsrer frawn kappelln auf der Stetten ze wienn gewidembt und gestifft hat und seinen Nachkomen furbasser die obgenanten gult Innzehaben zenutzen und zeniessen und allen Iren frumen damit zeschaffen als mit andern guetern die zu derselben mess gehoerent umb drewhundert phunt wienner phenning der ich gantz und gar verricht und gewert bin Mit der beschaidenheit, daz wir und alle die, die vorgenanten uber-teurung hauss und das zuhaus Innehabent und besitzent In die egenanten guelt alle Jare davon raichen und dienen sullen zu drein zeiten Im Jare zu sand Jorgen tag zu sand Michels tag und ze weichnachten zu yedem diensttag dreitzehenthalb phunt wienner phenning mit allen den nuetzen und Rechten als man ander purkrecht in der Stat ze wienn Raicht und dient, und wan der dienst versessen wirdet, so ist auf die vorgenante uberteurung hauss und auf das egenant zuhaus vor dem StatRichter in der Burgerschrann ze wienn umb zwiespild zeklagen ze viertzehen têgen als umb versessens purkrechts und der Stat ze wienn Recht ist. Es sind auch die vorgenanten guelt auf den obgenanten hêusern wider abtzelosen ze aintzigen oder miteinander ye ain phunt gelts umb Acht phunt wienner phenning an allen krieg. Ich pin auch mitsambt meinen erben unver-schaidenleich der vorgenanten gult auf den egenanten heusern Ir Recht gewern und scherm fur alle ansprach als purkrechts und der Stat ze wienn Recht ist Wêr aber daz In icht krieg oder an-sprach daran auferstunden von wem das wêr mit Recht oder ob In mit Recht daran icht abgieng was Sy des schaden nement das sullen wir In alles ausrichten und widerkeren an allen Irn schaden und sullen Si das haben daz mir und meinen erben unverschaidenleich und auf allem dem gut das wir haben in dem lande ze Osterreich oder wa wir es haben wir sein lebentigoder tod daruber zu ainem warn urkund gib ich In den brief besigelten mit meinem anhangundem Insigel und mit der vorgenanten Stat ze wienn anhangundem GruntInsigel Geben ze wienn an Mantag vor unserer frawn tag der liechtmess Nach kristi geburd viertzehenhundert jar darnach in dem vierund-zwaintzigistem jare.

Source Fulltext: Peter Peusquens