Wir Albrecht von gotes gnaden, Hertzog ze Österreich, ze Steir, ze Kêrnden, und ze Krain, Markgraf ze Mêrhern, und Grave zu Tyrol etc. Embieten den erbern weisen, unsern lieben getrewn..dem Burgermeister..dem Richter, und dem Rat ze Wienn, unser gnad und alles guot. Uns hat fuerbracht, unser getrewr, Niclas den Strutzer, Seidennater, wie weilent Paul der Seidennater, sein Sun, ain geschêfft getan, und Im das mitsambt Hannsen dem Froeleich emphohlen hab, auszerichten, und zevolfueren, darIn Im ettleich lêwt greiffen mainen, und das zu widertreiben. Emphelhen wir ew ernstleich und wellen sey, das egenante Geschêfft geschehen und auch damit gehandelt, nach der Stat ze Wienn recht und gewonhait, daz Ir dann nicht gestattet, daz yemant darIn greiff, und das widertreib, sunder daz es bey kreftn beleib, und volfuert werde, als es dann der egenante Paul geschafft, und geordent hat. Daran begeet Ir gaentzleich unsern willen. Geben zu Prespurg, an Sant Lucein tag. Anno etc. vicesimo nono. Under unserm Secret. d. d(ux) per se

Source Fulltext: Peter Peusquens