Ich Anna Petern des Tastlêr sêligen Tochter und Weichkarts des Schaitelperger Eliche hausfraw. Bekenn offenleich mit dem brief Das Ich Ingenomen und emphangen hab von den Erbern weisen hern Niclasen Undermhimel, dietzeit Munsmaister in Osterreich und des Rats der Stat ze Wienn, und Casparen Pirichvelder, burger daselbs, baid verweser der egenanten Stat Gruntpuech Ains und viertzig phunt wiennêr phening die mir zugepurent, und zu demselben Gruntpuech gelegt sein von wegen des hauses gelegen under den Pognêrn zunagst des Scharffenperger haus, das weilent der egenant mein vater selig und Hanns Tastlêr mein prueder Thoman dem Pognêr zu kauffen gegeben habent nach ausweisung seins kaufbriefs. Davon so vertzeich Ich mich desselben hauses, wissen-tlich mit dem brief und sag auch fur mich und mein Erben .. die Ersamen weisen den Burger-maister und den Rat der egenanten Stat und auch die obgenanten verwesêr Irs Gruntpuechs und Ir nachkomen der egenanten Ains und viertzig phunt phening gantz quit ledig und los, vor aller ansprach und vordrung ungevêrlich Mit urkund des briefs, besigelt, mit der Erbern Petern des Strasser, und Jorgen Hawgen des kursnêr paid burger ze wienn aufgedrukchten Insigeln die Ich zu getzeugnuss der sach mit fleiss darumb gebeten hab In und Irn Erben an schaden Darunder Ich mich mit meinen trewn verpinde alles das stêtzuhaben das vorgeschriben stet. Geben zu Wienn an Mitichen nach sand Dorothea tag Anno domini etc. Tricesimo.

Source Fulltext: Peter Peusquens