Ich Paul Wurffel Burger ze Wienn Bekenn offenlich mit dem brief von wegen der zwelff schilling phennig gelts purkchrechts die Jannsen von Ebenfuert auf der Plakeundlein haus an sand Peters freithof, gelegen verschriben sind die Ich lange Jar von Ir Ingenomen hab, und darumb mir vor dem Rat der Stat mit recht zugesprochen und anerlangt hat. Also das Ich denselben purkchrecht dinst, allen alslang Ich den hab Ingenomen zu der Stat Gruntpuech solt niderlegen DarInnn mir aber der Burgermaister und der Rat zu Wienn mein lieb herren durch meiner fleissigen pet willen ain guet getan und zu Irn Gruntpuech von mir genomen habent vuer Achtundzwaintzig pfundt phenning. Davon so verpind Ich mich fur mich und mein Erben gegen denselben meinen herren und Irn nachkommen mit meinen trewn wissentleich in krafft ditz briefs was In furbaser von des egenanten purkchrechts wegen krieg oder zuspruech auferstunden von wem das wer mit recht, das sullen und wellen wir In alles ausrichten und widerkern an allen Irn schaden Und sullen Sy das haben datz mir und meinen erben unverschaidenlich und auf allem unserm guet wo wir das haben nichts ausgenomen wir sein lembtig oder tod. Mit urkund des briefs besigelt mit meinem auf-gedrucktem Insigil. Der sach ist getzeug durch meiner vleissigen bet willen der Erber Oswalt Reicholf der Junger burger ze Wienn mein lieber vetter mit seinem aufgedrukchtem Insigel Im und seinen erben an schaden. Geben zu Wienn an freytag sand Mathias abend anno etc. Tricesimo primo.

Source Fulltext: Peter Peusquens