Wir Chunrat der Wiltwaericher zue den zeiten Purgermaister . und der Rat gemain der stat ze Wienne . vergehen und tun chunt allen den die disen brief lesent oder hoerent lesen . die nu lebent und hernach chunftich sind . umb die zwelif phunt wienner phenninge Geltes Purchrechtes . die her Nichlas von Eslarn dem got genade gechauft hat auf unserm und der Purger Rathaus ze wienne . und die er Geschaft hat . den Duerftigen in unserm Spital ze wienne . Daz wir und unser nachchomen . die selben zwelif phunt Geltes . dem selben Spital von dem egenanten Rathaus alle Jar dienen suln zu drin zeiten im iar . vier phunt an sant Michels Tage . vier phunt ze weihen-nahten . und vier phunt an sant Goerigen Tage . mit alle dem nutze und recht alz man ander Purchrecht in der Stat ze wienne dient . Und daz diseu sache fuerbaz also staet und unzerbrochen beleibe . dar umb so geben wir dem vorgenanten Spital . disen brief zue einem warn sichtigen urchunde diser sache versigilt mit unser Stat Chlainem anhangunden Insigil . Diser brief ist geben ze wienne nach Christes gepurd dreutzehen hundert iar dar nach in dem ayns und viertzgisten iar an unser vrowen abent alz sie Geborn wart.

Source Fulltext: Peter Peusquens