Ich Hanns Goetespruonnêr diezeit verwesêr sand Wolfgangs Cappellen gelegen auf dem Graben vor Stubentor ze Wienn. Bekenn fuer mich und all mein Nachkoemen und tun kund mit dem brief umb das haus und stadel und gartten daran gelegen vor Stubentor in der klebergassen genant die votzen zenagst des Spitals und Wolfharts des Schermitzêr Gêrtten das Ich von Wolfgangen dem Weyspachêr der vorgenanten Cappellen gekaufft hab, nach lautt des kaufbriefs darumb gegeben, und wann aber die erbern weisen Conrad Hoeltzlêr Burgermaister und der Rate gemain der Stat ze Wienn das egenant haus Stadel und Gartten mir zu der vorgenanten Cappellen hannden mit der Stat gruntInsigil gevertigt haben. Darumb hab Ich mich fuer mich und all mein Nachkoemen ver-weser der egenanten Cappellen verluebt und verpunden Gelob und verpind mich auch gegen den vorgenanten Rat und Iren Nachkoemen mit meinen trewn wissentlich mit kraft des briefs das Ich und mein Nachkoemen die das vorgenant haus Stadel und Gartten daran Innhabent und besitzent mit der egenanten Stat ze Wienn davon leyden suellen als ander mitburgêr daselbs ungevêrlich. Mit urkund des briefs besigilt mit meinem Anhangundem Insigil. Der sach ist getzeug durch meiner vleissigen pet willen der erber Lienhart Lehenholtzêr diezeit des hochgeborn fuersten hertzog Albrechts hertzogen ze Oesterreich etc. Amptman in der Scheffstrass und Burger ze Wienn mit seinem Anhangundem Insigil Im und seinen erben an schaden. Geben ze Wienn an pfintztag vor Letare in der Vasten Nach Cristi gepuerd viertzehenhundert jar darnach in dem drewund-dreyssigistem jare.

Source Fulltext: Peter Peusquens