Ich pruder Jacob van Velsperch ze den zeiten Prior . und aller Convent der pruder prediger ordens ze Wienn veriechen unde tuen chunt allen den . di disen brief lesen . oder hoeren lesen. daz wir uns mit verdachtem muet . und mit gemainem rat hawen verpunden . der erweren vrowen . vron Elspeten . weilen herren Otten Perez dem Got gnad . witwe ze Neunburch klosterez halb . daz wir alle tag sprechen shullen . ain Mess in unserem gotes haus . uf unser vrowen allter ewiklich . und einen . iartach . mit Mess und mit vigili begen shullen . alle iar dez nachsten tages nach sant Gyligen tach . umb ir . und irez wirtez . und irer vordern sel hail . darumb si uns williklich . und gern py irem lewen . da si iz wol getun machte ze ewiger gehugd . der vorbenanten sel . gegewen hat lediklich . vier phunt gult . alle iar immer ze enphahen . also beschaidenlich . daz man an dem selben iartach van zwain phunten . der selben . gult den brudern . alle iar ein mal gewen shol . und van den andern zwain phunten . daz ander mal an sant Thomas tach . alzehant var weichnachten . und auch di ee genant Mess mit vant dem iar tach . shreiwen shullen . in unser toten puech . ze pezzerer bedechticheit . wa man iz gwer versaumet oder verliezze . alzehant . so shol die dikch gesprochen gult . der vier phunt vervallen sein . dem kloster ze Liernveld . und daz lub wir . allz stet ze halten . py unsern trewen dar uwer ze ewigem urchund . so geb wir disen brief versigelt . mit unserez prioren insigel . und auch mit des Coventez insigel. Ditz ist geschehen . da van christez gepurd . ergangen waren tausend iar dreu hunder iar . dar nach in dem zway und vierzigistem iar . an sant Benedicten tach . zehant in der wochen dez swartzen suntages in der vasten.

Source Fulltext: Peter Peusquens