Ich Maister Erhart Herrant lerêr Geistleicher Rechten, Official zu Wienn und diezeit verweser unser frawn Cappellen auf der Stetten daselbs, Bekenn fuer mich und all mein Nachkomen Capplên und verweser derselben Cappellen und tun kund offenleich mit dem brief, allen lewten gegenwuertigen und kuenftigen Als weilent, der erber man Hanns der Scheibelwiser dem got gnad, ain Ewige Mess, in den Eren unser lieben frawn und sand Annen in der obgenanten Cappellen ze stifften geschafft hat, das also der erber Symon Pötel Burgêr ze Wienn und Magdalen sein hausfraw, die emalen den vorgenanten Scheibelbiser seligen auch eleichen gehabt hat, loebleichen volpracht und ainen newen Altar hinden in der egenanten Cappellen dartzu gepaut und die mess mit meiner gunst darauf gestifft, und der Cappellen und mir, zu ainer widerlegung, fuer die müe die dann ain Guster der Cappellen mit dem Caplan der mess haben sol, zehen phunt wienner pfenning ausgericht und bezalt habent. Daran mich gar wol benuegt, die Ich der ege-nanten Cappellen ze nutz und frumen angelegt hab, und darumb so hab Ich mich fuer mich und all mein Nachkomen Capplên und verweser der egenanten Cappellen gegen dem vorgenanten Symon dem Poetel, Magdalen seiner hausfrawen und allen Irn Nachkomen lehenherren der vorgenanten Mess mit meinen trewn gewilligt und verpunden und verpinden uns auch wissentleich mit krafft des gegen-burtigen briefs Also das ain yeder Guster oder Sacristan der vorgenanten kappellen, ainem yeden Capplan der egenanten mess mit kelch messgwant opherwein zeraichen und den Sagrêr auf und zu zusperren, gewêrtig sol sein, als anderer Capplên daselbs Recht und gewonhait ist an alle widerred ungeverleich. Und darueber zu ainer warn urkund und ewiger bestettigung der sachen so gib Ich In den brief versigilten mit des Officialsambt anhangundem Insigil. Darunder Ich mich fuer mich und all mein Nachkomen verpind alles das stêtzehalden und ze volfuern das an dem brief geschriben stet an alles gevêr. Geben zu Wienn an Sambstag vor sand Maria Magdalen tag. Nach Cristi gepurd viertzehenhundert jar darnach in dem vierunddreissigistem jare.

Source Fulltext: Peter Peusquens