Wir Albrecht von gotes gnaden Kunig ze Ungern, Dalmatien und Croatien etc. erwelter Kunig ze Behem, Hertzog ze Oesterreich, ze Steir, ze Kernden, und ze Krain, Markgraf ze Merhern, und Graf zu Tirol etc. Embieten den erbern weisen, unsern lieben getrewn .. dem Burgermaister, und dem Rat ze Wienn. unser gnad und alles gut. Wir lassen ew wissen, daz wir..der erbern Barbaren, unsers getrewn lieben, Ulreichs des Eytzinger, unsers Hubmaisters in Oesterreich hausfrawn, gegeben haben, uns Haus und Stadl, mitsampt dem Pawmgarten, hinden daran, in dem Gerewt vor Stubentor, zenachst weilent Herwarts auf der Sewl, gartten gelegen, nach begreiffung unsers sundern briefs daruber gegeben. Emphelhen wir ew und wellen ernstleich, daz Ir die vorgenanten Barbaren, des egemelten Hauss, Stadl und pawmgarten in der Stat gruntpuech, nutz und gewer schreibet, als gewondleich ist. Daran tuet Ir unser maynung. Geben an Montag nach dem Suntag Judica, in der Vasten. Anno etc. tricesimo octavo, unsrer Reich ze Ungern etc. in dem ersten jar, under unserm Insigl, das wir in unserm furstentum Osterreich geprauchen. com(missi)o d(omini) r(egis), l(itte)r(a) fact(a)

Source Fulltext: Peter Peusquens