Albrecht von gotes gnaden Roemischer Kuenig, zu allen zeiten merer des Reichs ze Ungern, ze Behem, Dalmacien, Croacien etc. Kuenig, Hertzog ze Oesterreich. Erbern weysen, und lieben getrewn. Wir haben vernomen, wie Ir unsern gevangen, die zu Wienn in dem Kêrnerturn ligen, zu morgen und zu Abent, nur ain Essen, und wasser zetrinkhen gebet, darumb Si in gross ploedikait, und in gross swechung komen moechtten, und ob man In das nicht pessern wuerd, daz Si villeicht vor hunger moechtten ersterben, das uns vast unfuegleich wêr, nach dem und vil guter gefangen under In sein, die uns, ob unser undertan icht gevangen wuer-den, moechtten zestaten komen. Emphelhen wir ew und wellen enstleich, daz Ir denselben gevangen, mit Essen notduerfticleich fuersehet, und In underweil wein, oder pyer, zetrinkhen gebet, damit Si von Speis wegen nicht in ploedikait oder krankhait komen. Daran tuet Ir gêntz-leich unser maynung. Geben ze Bressla, an Phintztag, vor sand Lucein tag. Anno etc. Tricesimo octavo. Unserr Reiche etc. im ersten jar, under unserm Secret. com(missi)o d(omini) r(egis) in cons(ilio).

Source Fulltext: Peter Peusquens