Wir Albrecht von gotes gnaden Romischer kunig, zu allenzeiten Merer des Reichs ze Ungern ze Behem Dalmacien Croacien etc. kunig, und Hertzog ze Osterreich etc. Bekennen. Als wir unserm getrewn Kuonratten dem Eytzinger unserm Hauptmann ze Drosendorf yetz ettwevil werleiher gesellen ze rossen, wider unser veind zugeschikt haben, daz wir denselben unsern Soldnern, allen und Ir yegleichen besunder, gelobt und verhaissen haben, wissentlich mit dem brief, was Si in unserm dienst Ritterleicher und redleicher schêden nemen von den veinden, nach desselben unsers Hauptmans geschêft, wissen und willen, die uns derselb unser Hauptmann, wissentleich gemachen mag. Daz wir Sy darumb gnêdicleich ausrichten, und betzalen sullen und wellen, nach unserr Rêt Rat und erkantnuss ungeverleich. Mit uerkunt des briefs Geben an Sambstag vor sannt Michels tag. Nach Kristi gepuerde viertzehenhundert jar darnach in dem newnunddreissigisten Jare. Unserr Reich im andern Jare. com(missi)o d(omini) r(egis) per cons(ilium).

Source Fulltext: Peter Peusquens