Den Ersamen weisen und fuersichtigen..Dem Buergermeister und dem Rate der Stat ze Wienn, und den verwesern Ires gruntpuchs. Embieten Ich Paul Ploechel, und Ich Ursula sein Swestêr, Felixen von Voytsperg saligen wittib, unser willig dinst. Als der erber weis Andre Hilprannt ewer mitgesworen des Rats, vorzeiten unser Swester Annen sein erêre hawsfrawen auf sein haws gelegen an sant Petersfreithof, genant des Strayher hawss, ze nagst dem Tuombbroesthof, nach laut aines briefs, und in ewerm gruentpuch versatzt, und verschriben hat gehabt, zwayhundert phunt phening zu haimstewr, und zwayhundert phunt phening zu verlorem guet. Nue hat derselb unser Swaeger die benanten vierhundert pfunt phening, haimstewr und verlorens guet, mit unserm willen und wissen, umbgelegt und In den egemelten rechten verschriben, und ausgetzaigt, auf seinen weingaerten gelegen ze Prunn im Pêrbestal genant der Zerrer ze nagst dem weingarten genant der Wâlich, daran wir ain guet genuegen haben. Als das in unsers gnaedigisten herren, des kunigs pergkpuch, zu Medling geschriben stet. Davon bitten wir ew mit allem fleizz, Ir wollet den obgenanten Satz in ewerm gruntpuch ausschreiben und den egenanten unserm Swâger, das obgemêlt haus wider ledig lassen das ist unser gueter will und wellen das in dhainerweis nicht widersprêchen an alles geverd. Mit vrkundt des briefs versigelt mit meinem obgenanten Paulen des Plochel aigem anhanngunden In Sigel. So hab ich obgenante Ursula sein Swester, Felixen von Voytsperg saligen wittib mit allem fleizz gepetten den edeln und vestten Pangretzen Reysperger meinen lieben Swager, das er sein Insigel fur mich, zege(ze)ugnuss aller obgeschriben sachen auch an den brief gehanngen hat. Doch Im und allen seinen Erben an schaden. Darunder. Wir uns und unser erben, mit unsern trewen verpindern alles das stet zehalden, das vorgeschriben stet an dem briefe der Geben ist nach kristi gepurd viertzehenhundert und darnch in dem viertzigistem jare an sant Elsbettentag.

Source Fulltext: Peter Peusquens