Fridreich von gotes gnaden Romischer Kunig zuallenzeiten Merer des Reichs Hertzog zu Osterreich und zu Steir etc. Erbern weisen und lieben getrewn. Als Ir uns yetz von ains Burgermaister und Rats wegen zu Wyenn geschriben und die zedeln von den Genanten, nach alter gewonhait habet zuogeschikt, haben wir vernomen . und lassen ew wissen, daz wir unsern lieben getrewn, Lewpolten von Ekhartzaw, Erharten dem Dossen, unserm vorstmaister, und Thomann dem Wisent unserm Huobmaister in Oesterreich unsern Reten empholhen haben, an unsrer Stat, von unsern getrewn lieben, Conraten dem Hoeltzler, unserm Burgermaister, und..dem Rate, so wir gesetzt und aufgenomen haben, als wir In die an ainer zedeln vermerket zuogesandt haben, gewoendlich aid und geluebde aufzunemen, als Sy ew werden zuerkennen geben . Emphelhen wir ew ernstlich und wellen, welh Sy under ew, von unsern wegen zu Rat nach lawt derselben zedeln, vordern werden, und die nicht vor im Rat gewesen sein, daz uns die in gegenwurttikait des Rectors, der Lerer und Maister, unserr universitet zu Wyenn, und derselben unserr Ret, swern, als sitlich und gewoendlich ist, als wir In das empholhen haben. Welh aber vor das vergangen jar, im Rat sein gewesen, daz uns die bey dem ayd, den Sy uns vormaln getan habent, geloben als das vor auch mit alter herkomen ist. Daran tuot Ir unsern willen. Geben zu der Newnstat an Eritag nach sand Erharts tag, anno domini etc. quadragesimo primo, unsers Reichs im ersten jare. com(missi)o propria domini regis.

Source Fulltext: Peter Peusquens