Fridreich von gotes gnaden Romischer Kunig zu allen zeiten merêr des Reichs Hertzog ze Osterreich und ze Steyr etc. Erbern weisen und lieben getrewn. Wir lassen ew wissen, daz unser lieber getrewr Kristoff von Liechtenstain von Nicolspurg, unser Rat, heint in der nacht, aus unserr Stat hie das Geslos und vesten Harrenstain, hat ersteigen lassen, dasselb Geslos sich doch noch nicht gar ergeben hat, und wan uns unserr lieben Muomen und auch unserm vettern kuenig Laslawen, das yetzgemelt Geslos vast widerwêrttig ist, Davon ermanen wir ew, begern, und bitten, mit sunderm ernstlichem fleiss, daz Ir uns eylund, und an vertziehen, ainen geraisigen zeug und auch fusvolkh, wolgezeugt und geharnascht, alsvil ir des aufbringen mueget, her zu uns schikhet, und ew darin fuerderleich, und willig beweiset, das kuembt uns, von ew zu grossem dankh, und wellen das gnediclich gen ew erkennen. Geben zu der Newnstat an freitag nach sant Pauls tag Conversionis. Anno etc. XLI°, unsers Reichs im ersten Jar. com(missi)o propria domini Regis.

Source Fulltext: Peter Peusquens; siehe auch: • Schlager, Wiener Skizzen, N. F. 3, 494-495