Elizabet von gotes gnaden kuenigin zue Ungern etc. Eribffraw zue Bechem Hertzogin zue Oesterreych und Markraffin zue Mercheran lieber Getrewer wir lassen dich wissen, das wier willen haben zue kuemen gen wien zue unserm lieben vettern dem Roemischen kuenig, und auch zue den Bechemischen hern mit den wier unsere not und sachen haben vonoet aldo zue volenden, und haben vernoemben, wie du eyn luestigs und eyn wolgelegen haws hast, das vor uns wol ffuegleich wer zue eyner herbrig, beger wier due wellest dich, und das haws dor zue schikken, das wir dorin gesten, und herbrig haben muegen, auch das wir uns als haeint von hinen heben, und als morgen bey dier sein wellen dornoch wis dich zue schikken. Auch so beger wier das du uns, vor unsrer hern Ritter und knecht schaffen last, und bittest mit unserm wort Buergermaster Richter und den Rat umb herberig und hawsser, die do nochent bey dier gelegen sein, das die unserig, nicht ffer zue uns zue kuemben haben, und das also welst ausrichtten, noch der Cedel lawt die wier gen wien unsern lieben getrewen Buerger-mastern Richter und dem Rat, bey unserm Erhalt (Ernhold / Herold) Ungerlant gesant haben. Geben zue Prespuerk am Mantag noch unsers Herren Auffartz tag Anno domini etc. XLI°.

Source Fulltext: Peter Peusquens; siehe auch: • Schlager, Wiener Skizzen 2, 63.