Mein dinst liebe els ich laß dich wyssenn das ich gesundt pin von denn genaden gots des selbenn geleychen hortt ich alzeitt gerne von dir sagenn auch liebe els ich schickett dir gerne tzerung so hab ich nimantt an mugen thunnen dem ich vertraut hiett und wer vyll leicht dem poten genomen worden und du scholt dir gar guttleich thunnen und was du verseest das wyll ich dir wider lossen als pald ich haim chumpt auch laß ich dich wyssenn das wir ein statt gewunnen dem chunig an hayst furstenveld da hab wir grosser gutt in funden das moenntt sey das man es recht tayll es schullen woll als auff XXX gulden auff ein pferdt aber mann hatt noch chainem nichts geben aber wir sein altag wardten wann sich die lanntschaff fur uns tzech und mann wirdt fursich fur uns tzechen Dar umb liebe els hiett ich mein tayll und das ich dann haim mocht ich belieb nicht lenger wann der chunig main uns al tzu toten damitt pfleg unserer gott geben tzu furstenveld an unsser frawen abennt. Ulrich Cheschinger dein mann. 2815 b r Und du scholt sprechen zu ider man ich sey pey dem weytracher tzu ungern und sag im haws nach nedertt das ich pei dem stainer sey und liebe .. els pis ......... verschreyb mir wie es dir ge und schreyb mir das ich an alles verziehen haim chumb ob mir mein tayll geltzt dy weyll wurdt so zaigett ich dem hawpman dein bryff und sprech ich muss haim so precht ich das mein mitt gelunphen haim liebe els thu als ich ein vertrawen tzu dir hab.

Source Fulltext: Peter Peusquens