Wir Albrecht von Gotes gnaden Hertzog ze Oesterreich, ze Steyr, und ze Chernden,Tun chunt offenlich mit disem brief, umb die zwen weingarten gelegen bey Medlich der da ainer haizzt, der Gotesman am Wartperch ze nehest dez pharrer weingarten, von Medlich, und der ander haizzet der Seyfrid und leyt bey der Urtayl, ouch bey Medlich, daz di erber Engel, unsers diener, des Huerrenbekchen seligen hausvrow, dieselbn weingarten, mit irem beraiten Heyrat guet von Zadel dem Juden Pluemen aydem von Newnburch und von Judel dem Juden recht und redlich gechouft hat, und seyn ouch wir, der vorgenanten Huerrenbekchinnen uber die obgenanten weingarten, rechter scherm fuer alle ansprache, mit urchuend ditz brief, der tze Wiennen geben ist, an Eritag voer sand Marien Magdalenen Tag Anno domini millesimo CCCo xlimo quarto.

Source Fulltext: Peter Peusquens