Wir Fridreich von gots gnaden Romischer Kunig zu allen zeiten Merer des Reichs Hertzog zu Osterreich ze Steir ze Kernden und ze Krain Grave ze Tyrol etc. Embieten den erbern weisen unsern lieben getrewn..dem Burgermaister, dem Richter, dem Rat und den burgern gemaintleich zu Wienn unser gnad und alles gut. Ew ist villeicht wol wissentleich wie die veint von Grub gross schêden mit huldung und andern beswêrnussen im Lannd getan habent, dadurch sich Herrn, Ritter, Knechtt und ander unser undertanen, desselben untails auf der Lantschaft trost, fuer dasselb haus habent geslagen und das aus der veind hannd mainent ze bringen, nu habent sich die veint vast herenkegen gesterket, und ligent mit irm her nicht verr von In, und mainent dasselb haus zeretten und die unsern von dem veld ze dringen. Nu versteet Ir wol ob das geschech daz uns, ew und dem Lannd, unueberwindleicher schad daraus gieng. Emphelhen wir ew, begern und pitten gar ernstleich, daz ir ew an vertziehen mit volkh ze rossen und zu fussen, wêgen und andern notduerften bestellet so ir sterkist muget, und die auf den kunftigen Mitichen gen Egenburg ze andern unsern Lantleuten, die wir auch dahin gevordert haben, schikhet, dann verrer fur Grub ze ziehen, und das obgemelt heer helfen ze retten und ew darin furdert, ob ir solch ewr volkh vor demselben Mittichen mueget geschiken sich dahin zu fuegen, wan ir wol versteet, daz die Sach nicht pit hat, Sunder begern wir an ew, daz ir das in der Stat auf den plêtzen auch offenleich lasset beruffen, damit sich yederman desterpas und furderlicher mug beraitten. Das wellen wir in allem gut gen ew erkennen. Geben an unser lieben frawntag nativitatis. Anno domini etc. XLImo. unsers Reichs Im andern Jare. com(missi)o domini Regis per cons(ilium).

Source Fulltext: Peter Peusquens siehe auch: • Schlager, Wiener Skizzen, N. F. 3, 503 - 504