Ich Marchs Enenkchl. Tumherrn zu Passau. Bekenn das ich meinem liebem Bruder Albrechten dem Enenkchel meinen gantzen und volligen gewalt gegeben hab. und gib auch wissentlich mit kraft des briefs. von wegen ains halben hauss gelegen bei sand Peters freithof, am egk, zenagst des Muenss-maister haus, das mich und meine geswistreid von unserm lieben vater Joergen dem Enenkel seligen ist anerstorben und angeerbt. Also das derselb Albrecht Enenkchl mein bruder an unser aller stat verkauffen und das verttigen sol und mag mit kaufbriefen und gruntherren als dartzue gehoeret. Auch meinn tail gelts so mir daraus gepuerdt an meiner stat Inzenemen und was er von mein wegen darInn handelt und tuet, das ist alles mein guetleicher will zu gleicher weise und in gantzer kraft und macht als ich selbs gegenbuertig waer und das getuen moecht, und gelob auch fuer mich und mein erben solh verkauffen und den gegenwuerttigen gewalt, unwider-rueffenlich steet zu halten und dawider nicht zu tuen noch zue sprechen in kainerlay weise an alles gevaer. Und des zue uerkund gib ich Im den brief versigelten mit meim aufgedrukchten Insigel und des ist getzeug durch meiner fleizzigen gepet willen der Edel Peter der Muelbanger mein lieber Swager das er sein Insigel an den brief aufgedrukcht hat Im und sein eriben an schaden. Geben an sand Niklas tag Anno domini etc. quadragesimo primo.

Source Fulltext: Peter Peusquens