Elizabeth von gots gnaden kuniginn zu Ungern, Dalmatien, Croatien etc. Erbling zu Behem, Hertzoginn zu Osterreich zu Steyr, und Marggrafinn zu Merhern etc. Sunderlieben getrewn, wir glauben, daz euch wol wissent sey, daz der hochgelerte maister Hanns Czeller (Gzeller), unser arzt, uns vil angenemer dinst, mit fleis getan hat, darumb wir von Im gebetten und angerueft warden sein, mit begernus, daz wir uns, unsern getrewn Symon, zaiger des briefs, seinen diener und freunt, der da muot hat, zu priesterlicher wirdikeit und geistlicher ordnung ze greiffen, empholhen wolten lassen sein. Darumb begern wir an euch, und pitten mit sunderm fleis, daz Ir zum ersten, umb gots willen, und darnach von unser pet, und unsers lieben Suns, kunig Laslas, ewrs naturlichen hern wegen, die erste gots gabe ader pfrunde, dy Ir ze leihen habent, und schierest ledig wirt, gunstlich vor meniklichen andern fursechen und In damit beratten wellet, daran erzaiget Ir uns ain sunder wolgevallen das wir dann in andern sachen gen euch gnediklich erkennen wellen. Geben zu Prespurg an unser lieben frawn tag Concepcionis, Anno domini millesimo quadringentesimo quadragesimo primo. com(missi)o propria domine Regine.

Source Fulltext: Peter Peusquens