Wier Albrecht von gotes gnaden, Hertzog, ze Oesterreich, ze Steyr, und ze Kernden. Tuen chunt mit disem brief. Daz wier angesehen haben, den gepresten, und den schaden, den unser choufleut, von unsern Landen, gehabt, und genomen habent, die irer choufmanschaft, gewandelt, und gevaren sind, uber die Leyta, fuer daz New Hous, gen Oedenburch, von Raubnuzze, und von merung, der Mautten, und von andern Newen setzen, di man, auf si, und auf ire Choufmanschaft, geslagen und gelegt hat, da von si ze groezzem schaden chomen sind. Und haben sie ouch, dar an besorgt, und haben in, ze nutze, und ze frumen, die gnad getan, und tuen ouch, mit disem brief, daz wier alle wandlung, alle choufmanschaft, und niderlegung, die unser choufleut, von unsern Landen uber die Leyta, gen Oedenburch, gehabt habent, legen, in unser Stat, ze Prukk, bei der Leyta. Da von gebieten wier, allen unsern choufleuten, von unsern Landen, die, di obgenanten strazze, uber die Leyta, gevaren sind, daz die fuerbaz, mit choufmanschaft, alswo nindert, varen, wandeln, und niderlegung, mit irer choufmanschaft, haben sullen, denne in der voergenanten unserr Stat ze Prukk, und wellen, und setzen ouch, wer der wer, der in unsern Landen, gesezzen ist, in Steten, in Merchten, oder dorffern, swo daz ist, der fuerbaz, wandlung, und choufmanschaft, hiet, gen Oedenburch, uber die Leyta, der, sol uns, und unsern Nachkomen, und ein igleicher, der geselschaft an der choufmanschaft, mit im, hat, oder fuerdrer, und fuerer, derselben choufmanschaft ist, ze pezzerung, vervallen sein, ze geben, zwaintzig phunt, wienner phenning. Und daz in, die gnad, von uns, und unsern Nachkomen, fuerbaz, also stet, und untzebrochen, beleib, daruber, so geben, wir in, disen brief, besigelten, mit unserm Insigel. Der geben ist, ze Wienn, an dem Sunntag, so man singet . Judica. Nach Christes geburd, dreutzehen hundert jar, darnach in dem fumf viertzkisten . jar .

Source Fulltext: Peter Peusquens