Fridreich von gots gnaden Romischer kunig zuallenzeiten Merer des Reichs Hertzog ze Oesterreich und zu Steir etc. Erbern weysen und lieben getrewn. Als unser getrewr Hainreich Kornmess unser burger hie zu der Newnstat ettwevil wein mit willen und wissen Jorgen des Ratten von solher geltschuld wegen, so Im derselb Ratt schuldig worden ist, und gelten sol, bei dir Hannsen Hargenseer dieweil unserm Statrichter ze wienn, in phandweis nidergelegt, darauf aber Jacob Aichelberger von seiner herren wegen geklagt hat. Also begern und bitten wir ew mit sunderm fleiss und ernst, daz Ir dem benanten Kornmessen ain fuerderlich recht in den obge-melten sachen widergeen lasset, und darInn also hanndelt, damit was du der Hargenseer als ein Richter in denselben sachen nach aim pillichen gehandelt, haftkrefftig beleib. Daran tuet Ir unser maynung und gut gevallen. Geben zu der Newnstat an phintztag nach dem Suntag Invocavit in der vasten, anno domini etc. quadragesimo tercio, unsers Reichs im dritten jar. commissio propria domini Regis

Source Fulltext: Peter Peusquens