Ulreich von gots gnaden . Graf ze Cili zu Ortenburg und in dem Seeger (Zagorien) Erber weis und besunderlieben. Uns ist von wegen Casparen Herman ewers Mitburger zu Wienn ze erkennen geben, wie er ain erberen und redlichen kauf, mit Hannsen Franken auch Burger zu Wienn umb ain haws vor frumen lewten getan habe, darInne Im aber, als wir vernemen Irrung beschicht. Also begern wir und bitten ew mit sunderm vleiss, daz ir ew den benanten Casparen Herman von solhes kaufs wegen, der doch redlich und vor frumen lewten beschehen und ergangen ist umb unsern willen guenstlich und fuerderlich wellet lassen empholhen sein, damit er unser bett darInne gen ew emphinde ze geniessen, damit Im nicht verrer Irrung beschicht, daran ertzaigt Ir uns sunder gut gevallen, daz wir hinfuer gen ew und den ewern gern erkennen wellen. Geben zu der Newnstat an Eritag vor unser lieben frawen tag Assumpcionis Anno domini etc. XLIII°.

Source Fulltext: Peter Peusquens