Von gottes genaden Albrecht pfalltzgrave bei Rein Hertzog in Bairn und Grave zu Voburg etc. Unnsern gunstlichen grus zuvor fursichtigen weisen lieben besundern Als von solichs erbs und guts wegen so ainer genant Vinsternwalder der mit tod abgangen ist bei ew hinder sein verlassen hat und dartzu ettlich partheien von fruntschaft wegen erben mainen ze sein Als das so wir vernemen wol fur ew gebracht ist oder noch beschehen moecht und darum wir ew vormaln fur ainen unn-sern armen man genant der Schambacher geschriben und gebeten haben ew den bevolhen lassen sein soverr er Recht hab nach Innhallt desselben unnsers schreibens dabei lassen wir es noch be-steen dann es ist fur uns komen unnser diener und lieber getrewer Eglof Dieberskircher von sein und ander seiner fruntschaft wegen die auch zu solichem verlassen gut erben mainen ze sein und hat uns furgebracht wie sy umb solichs das sy die nagsten erben zu solichem gut sollen sein Ir ge-rechtikait fur ew zebringen mainen und uns undertanigklich gebeten In auch unnser furdrung dar-Inn an ew zetun Herauf so Bitten wir ew mit sunderm vleiß Ir wellet ew die egenanten Dieberß-kircher mit irer fruntschaft in denselben irn sachen von des vorgeschriben verlassen guts und erbschaft wegen umb unnsern willen gunstlich lassen bevolhen sein soverr sy recht haben daran erzaigt ir uns sunder wolgevallen das uns genadiklich gen ew zu erkennen stet wo sich das gepurt und an uns gelannget Datum Munchen an pfintztag vor Anthony Anno etc. XLIIII°.

Source Fulltext: Peter Peusquens