Ulrich Grave zu Otingen Unsernn gunstlichen grus und alles gut zuvor. Erbern weysen lieben frund Uns bringt fur ain unser Armman von Nereßheim weyser ditz briefs wie Im zwen brueder bey euch In ewr Stat mit tode abgangen sein, mit namen genant Steffan Mair und wie die selbigen sein bruder ettwie vil habe und ligends gut hinder In verlassen haben . der selben habe und guts Er und sein Swester Anna Marien recht und nehst erben seien. Biten wir euch fruntlichen mit allem fleis das Ir unsern armen man, umb unsern willen In solichen sachen ewr gut furdernuss mittailen hilfflichen und raitlichen sein wollent, damit er sich zu solichem Erbe dester naeher gefugen und underziehen mueg Daran thund Ir uns soliche liebe, das wir hinfur mit gutem willen umb ew und die ewrn In solichen und andern sachen beschuldn und dester gerner thun wollen das ew liebe ist. Datum Paldern. Am Montag nach dem hailigen Ostertag Anno domini etc. XLIIIIto

Source Fulltext: Peter Peusquens