Wir Fridreich von gotes gnaden Romischer Kunig zuallenzeiten Merer des Reichs Hertzog zu Osterreich, zu Steir, zu Kernden und zu Krain, Grave zu Tirol etc. Embieten den Erbern, weisen unsern getrewn lieben..dem Burgermaister Richter und Rate zu Wienn Unser gnad und alles gut Uns habent furbracht unser getrewn .. die Verber daselbs zu Wienn, die in unser kamergericht gehoern, wie die huetter auch daselbs, die huet so Sy machen selber verben das In nicht zu-gehoere, und wider derselben verber Recht und Herkomen sey, des Sy sich beswert dunkchen Emphelhen wir ew und wellen ernstleich, daz Jr mitsambt unserm lieben getrewn, Hannsen von Eberstorff Obristen Kamrer in Österreich und unsern getrewn Niclasen underm Hymel unserm Muenszmaister und Hannsen Scharffemperger unserm Anwalt in unsrer Muensz ze Wienn darob seyt und bestellet, daz die benanten hueter furbazzer nicht Verben, Sunder das die verber tun lassen, als In dann das zugehoeret, Doch daz Ir bestellet, daz dieselben Verber ainen beschaiden und zymlichen lon anders wann von andern nachdem Sy Inwoner zu Wienn sein davon nemen Daran tut Ir gentzlich unser maynung. Geben zu Baden an phintztag vor dem heiligen Phingsttag Anno domini etc. XLIIII°. Unsers Reichs im fuonfften Jar. Comissio domini Regis per consilium.

Source Fulltext: Peter Peusquens; siehe auch: Hormayr, Wien 2a, 103 n° 95.