Fridreich von gots gnaden Roemischer Kunig, zuallenzeiten Merer des Reichs, Hertzog zu Osterreich, und zu Steir etc. Erbern weisen und lieben getrewn. Uns hat fuerbracht, unser getrewr, Hanns Paltinger, wie er an stat seinselbs, und Virgili Paltinger, seins Bruoder, zu dem guot, das weilent Peter Paltinger, Burger zu Wienn, hinder sein gelassen, und das yetz unser getrewr, Hanns Steger unser Burger daselbs zu Wienn, innhat, als die nagsten erben gerechtikait haben, als er ew dann das wol wird zuerkennen geben. Emphelhen wir ew, und wellen ernstlich, daz Ir demselben Hannsen Paltinger gegen dem egenanten Steger, darumb ain fuerderlich Recht widergeen lasset. Daran tuot Ir gentzlich unser maynung. Geben zu der Newnstat, an freitag nach Gotsleichnamstag. Anno etc. XLIIII°. Unsers Reichs im fuenften Jare. commissio domini Regis, d(omino) Pangr(atio) Rinntsch(aid), cons(iliario), referente.

Source Fulltext: Peter Peusquens