Ich Reynprecht der Mitterndorffer, vergich und tuen chunt allen den die disen brief lesent oder hoerent lesen, die nu lebent und hernach chuenftich sint. daz ich mit guetem willen mit verdachtem muet zu der zeit do ich iz wol getuen mocht . verchauft han meins rechten an erstorben guetes sechtzich pheninge wienner muentze dienstes auf Ulreichs wise von Puchs . die da leit ze Aychawe der vier und zwaintzich Tagwerich sint ze naehst dem Potendorffer . und die mich auch anerstorben sind von Vater und von Mueter den bayden got genade, und die mich auch mit fuertzicht und mit lozze ze rechtem Erbtail an gevallen sint, gegen meinem bruder Jansen do wir mit einander getailt haben . die vorgenanten sechtzich pheninge wienner muentze dienstes . han ich Recht und redleichen verchauft und geben, mit allem dem nutz und rechten alz ich si her pracht han, und alz si auch von alter her choemen sint, umb drew phunt wienner pheninge, der ich gar und gaentzleich gewert pin . dem vorgenanten Ulreichen von Puchs, und seiner hausvrowen vron Margreten, und irn Erben, fuerbaz ledichleichen und vreyleichen ze haben und allen irnfrumen da mit ze schaffen verchauffen versetzen und geben swem si wellent an allen irrsal, und pin auch ich dez vorgenanten dienstes . ir recht gewern und scherm fuer alle ansprach, nach des Landes recht ze Oesterreich. Waer aber daz si mit recht an den oftgenanten sechtzich phening dienstes icht chrieges oder ansprach gewunnen von swem daz waer, oder daz in mit recht an dem selben dienst icht ab gieng. daz sol ich in an alle ir mue und an allen irn schaden alles auz richten und wider chern, und suln auch si daz haben auf mir und auf allem meinem guet daz ich han in dem Lande ze Oesterreich . ich sey lebentich oder tode. Und daz diser chauf fuerbaz also staet und unzerbrochen beleibe . dar ueber so gibe ich in disen brief ze einem warn urchuende, und ze einer Ewigen vestnunge diser sach versigilt mit meinem Insigil. und mit dez vorgenanten meins bruder Insigil Jansen, und mit meins swager Insigil, Laurentz des Lanholtz, die diser sach gezeug sint mit irn Insigeln . Diser brief ist geben ze Wienne nach Christes geburde dreutzehen hundert iar. dar nach in dem Neun und viertzgisten iar . an dem Prehen Tage

Source Fulltext: Peter Peusquens