WIR Dietreich der Flusthart . zu den zeiten purgmaister . und der Rat Gemain der Stat ze Wienne Vergehen . an unsers spital stat . offenlich an disem brief . umb die drey schilling wienner phenninge gelts purchrechts . die daz selbe unser Spital gehabt hat . auf Nichlas weingarten von Raechleinstorf . der do leit an dem Nuzperg des ain achttail . ains Jeuchs ist . ze naehst . dem weingarten . der gewesen ist hern Hainreichs dez Langen saelig und die dem vorgenanten unserm spital . auf dem egenanten weingarten . zway iar . versezzen . und ungedient gewesen sinde . daz wir mit Gutem willen . mit verdachtem muet . und mit veraintem Gemainen rat . zue der zeit do wir es wol Getuen mochten . die Egenanten drey schilling geltes purchrechts . und den versezzen dienst allen . an dez obgenanten unsers Spitals stat . Recht und redleichen . auf Gegeben . und ledich lazzen haben . dem vorgenanten Nychlasen von Raechleinstorf . und alle die . die den obgenanten weingarten fuerbaz inne habent . und besitzent . vor allem dienst und vor aller ansprach . Und da wider uns auch der selbe Nychlas von Raechleinstorf . unserm obgeschriben spital Ledichlich . aus Gezaigt . Gemacht und geben hat . daz phunt gelts purchrechts . gelegen auf Joerigen weingarten dez Saeuzer gelegen ze Otakchrinn in dem Amaispach . dez dreu achtail sint ze naehst Chuenraden dem Payr . und der weiln Nychlas dez Weigants aydem gewesen ist . daz sein bruder Fridreich von Raechleinstorf saelig . mit dem selben rechten . zue unserm spital also geschaft hat . Und suln auch wir . noch ander niemant . von unsers spitals wegen mit chainerlay sachen . auf den obgenanten weingarten . umb den Nuzperg . umb die drey schilling gelts noch umb daz versezzen purchrecht . fuerbaz nimmer mer chain ansprach . noch chain vodrung gehaben . noch gewinnen weder umb vil . noch umb wenige. Und dez zue urchuent so geben wir in disen brief versigilten mit unsers Spitals anhangendem Insigil . der geben ist ze Wienne nach Christes gepuerde dreutzehen hundert iar dar nach in dem Ain und fuemftzigistem iar . an sande Agnesen Tage.

Source Fulltext: Peter Peusquens