Ich Albrecht von Gerhartztorf . Dietrichs suen des Altschergen von Raechleinstorf und ich Christein sein hawsvrow wir vergehen und tuen chuent allen den die disen brief lesent oder hoerent lesen die nue lebent . oder hernach chuenftich sint umb alle die chrieg und ansprache die wier gehabt haben. auf dem weingarten gelegen an dem Puesenperg in dem Goltal. dez ayn halbz jeuch ist ze nechst Ulreichs weingarten dez Helffer do man alle iar von dient hern Dietreichen dem Gyleis ainen halben Emmer weins ze perchrecht und aynen helblinch . ze voytrecht und nicht mer . den mein pruder Friderich von Rachleinstorf . gechauffet hat . umb sein aigenhaffts guet und der auch in geschafft hat meinem pruder Nyclas von Raechleinstorf als der geschafft brief . sagt den sein prueder Friderich von Raechleinstorf gegeben hat Daz wir mit unser Erben gueten willen und guenst mit verdachtem muet und mit gesampter hant zu der zeit do wier ez wol getuen moechten und mit dez perchherren hant, dez vorgenanten hern Dietreichs dez Gyleis Des daz mit unsern trewen an allez gevaer verbleibt . und verpuenten haben. Gegen dem vorgenanten meinem prueder Nyclas von Raechleinstorf . Also daz wier . dez vorgenanten chriegs und ansprache den wier auf den vorgenanten weingarten gehabt haben . Mit Erbern Laueten beweist sein . daz wier sein nicht recht gehabt haben. und davon so sueln wier noch alle unser erben furbaz nimmer mer mit dehainerlei sachen swi so die genant moechten sein hintz meinem prueder Nyclasen . auf daz egenant halbe jeuch weingarten noch hintz allen den . die ez fuerbaz inne habent und behoerent . dehain ansprach chrieg voderung noch rechtens gehaben noch gewinnen weder umb vil noch umb wenich Und suln . wir dennoch dar zu umb daz ander Guet allez daz der egenant mein prueder Friderich von Rachleinstorf hinder im lazzen hat swi so daz genant ist oder swo so daz gelegen ist mit dehainerley sachen . nimmer mer dehain ansprache gehaben noch gewinnen weder umb vil noch umb wenich denne daz ez allez beleiben sol in dem rechten als der geschafft brief sagt und der brief . da der vier Ratherren insigiln an ligent Und wand wier selber nicht aygens insigils haben dar umb so geben wier in disen brief ze einer ewigen vestenung diser sache versigilten mit dez Perchherren insigil dez vorgenanten . hern Dietrichs dez Gyleis und mit hern Fridereichs insigil dez Rueschleins . und mit hern Ulreichs insigil dez Pollen puerger ze Wienne . die wir daz gepeten haben daz si diser sache zeug sint mit iren insigiln Diser brief ist geben ze Wienne nach Christes gepuert dreutzehen hundert iar dar nach in dem ayn und fuemftzgistem iar dez Sunntags vor dem Palme Tage.

Source Fulltext: Peter Peusquens