Wir Albrecht von gots genaden . Hertzog ze Oesterreich ze Steyr und ze Chaernden .. Vergechen offenleich an disem brif. Umb die Saetze die wir . unsern Landherren . und unsern purgern gemain in allen unsern Steten und Maerchten in Oesterreich. die weingart pau habent . auf gesatzt haben . und durch Gemainen nutz und frumen . des überain choemen sein . Umb daz Ion und umb die recht . die ze weingart paus arbait gehoerent . dez ersten . daz man allenthalben in allem unserm land ze Oesterreich geben sol . ainem gueten sniter . ainem gueten inschaider iegleichem sechs phennig . ainem gueten hawer . ainem guten grueber iegleichem fumf phenningen . und ze Newen phenningen ainem gueten hawer vier phenningen . ainer panterin . ainer jaeterin iegleicher drey phenning . und daz auch all arbaiter alle zeit gleich aus gen . des morgens . alz der tag auf get . und chains mittentags nicht in gen . und dez nachtes in gen . alz die sunn ze paw in get . Und swelher purger oder gast seinem weinzuerl mer haizzet geben . denn daz gesatzt Ion . der sol als oft er iz ubervert geben fumf phunt Wienner pfennig ze wandl . Alz oft iz aber der weinzuerl an seines herren geschaefft und hauz ubervert, in swelhen wegen daz ist . der sol daz selb wandel geben hat er der pfennig nicht man slach im ab ain haut Und swelher hauer oder arbaiter mer vodert und daz gesatzt recht fraeveleichen versmaecht . und davon muezzich gieng swo man den an chuempt . den sol man auf halden und fraevelich pezzern fur einen schedlichen man. Da von so gebiten wir unserm rat und . den purgern gemain der Stat ze Wienn . und wellen auch ernstleichen daz ir daz vorgenant gesatzt Ion und recht allenthalben umb euch einer Razzt weit . besetzt verhuett und dar zu secht und tuet . daz da wider iemant anders tue denn vorgeschriben stet . alz ir unser genad und huld behalten wellt. Mit urchund ditz brifs . geben ze Wienn an sant Agathen tag . nach christes geburt dreutzehen hundert jar darnach in dem zway und fumftzigisten jar.

Source Fulltext: Peter Peusquens