Wir Albrecht von Gots gnaden Hertzog ze Oesterreich ze Steyr und ze Chernden. Enbieten unsern getreuen allen purgraven Richtern, amptlawten, pergmaistern. und allen andern, der diser brif gezaigt wirt. unser gnad und allez guet Umb den satz. den Wir nach unser Lantherren und unser purger Rat, umb allez weingart pau gesatzt haben, daz man geben sol ainem sniter, ainem inschaider iglichem sechs alt phennigen. und bey Newn phennigen fumf New phennigen. Einem grueber, einem hawer iglichem fumf alt phennig und bey Newn phennigen vier New phennig. Einer Rebchlauberinn einer jaterinn ainer panterinn iglicher drei alt phennig und bey Newn phennigen zwen New phennig. Wellen wir und gepieten eu auch ernstlichen daz man in allen aygen alle arbaiter und arbaiterinnen. von wann si dar chomen beherwergen sol. und swer dez nicht tuet. alz oft er ez ubervert alz oft ist er uns vervallen der pezzerung, die hernach geschriben stet. Wir verpieten auch bey unsern hulden daz niemant chainerlay weingartpau ze furgedinge hin lazze noch beste. weder vil noch wenich. Wir setzen auch, daz all arbaiter an die arbait gen suln. des morgens alz der tag auf get. und dez nachtes in gen. alz die Sunn nider get. Wir tuen auch eu die gnad, durch besunder pet. daz man dez Mitten tags in gen sol. an alle den Steten do ez von alter gewonlich ist gewesen und swelher arbaiter daz lon oder die gnad. die wir em getan haben versmaecht, den suln die, die ez von im hoerent oder wizzent. auf halden. und den wellen wir swerleich dar umb pezzern alz einen schedleichen man Und swelh dez nicht entaeten und si hin liezzen. die suln uns derselben pezzerung vervallen sein. Und swer die vorgenanten unser gepot und saetz ubervert. alz oft er daz tuet, alz oft ist er uns vervallen fümf phunt wienner phennige oder hat er deu phennige nicht, so sol man im abslahen ain hant. Geben ze Wienn dez freytags vor Oculi Anno domini Mo Co Co Co Quinquagesimo tercio.

Source Fulltext: Peter Peusquens; Tomaschek, Rechte und Freiheiten I, 129 no 48 (viele Fehler)