Wir Graf Fridreich, und wir Graf Ulreich paide vettern von Schawnberch und alle unser Erben Vergehen offenleichn an disem brief und tuen chunt allen den die in sehent oder horent lesen. die nu lebent und hernach chunftich sint. daz der beschaiden man Niclas der Wuerffel purger ze wienn und vrow Anna sein hausvrow und ir Erben. uns enpholichen hat hintz unsern Gnaden und treun. allez daz guet daz Si von uns ze lehen habent . swie so daz genant ist . oder swo so daz gelegen ist. des wir recht vogt und lehen herren sein . und suln auch des ir scherm sein vor allem Gewalt und vor allen unrechten . Wer aber daz in furbaz yemant mit dehainer lay Gewalt oder mit dehainer lay unrecht . in die selben Gueter vallen wolt . von welicher lay sachen daz wer . oder swie sich das Gefuegt . So suln si sich dann umb alle die Gueter die si von uns ze lehen habent alz vorbenant ist . haben . ze allen den rechten die ir alter brief sagt . den si von Graf Chunraten von Schawnberch habent . Und Geben in dar uber disen brief ze einem warn sichtigen urchunde diser sache versigilten mit unsern paiden anhangenden Insigiln . Der brief ist Geben Nach Christs Geburde dreutzehen hundert iar dar nach in dem dreu und funftzigisten iar an sande Niclas Tage.

Source Fulltext: Peter Peusquens