Ich Symon der Viviantz purger ze wienne . und ich Katrey sein hausvrowe . Wir vergehen und Tuen chuend allen den die disen brief lesent oder hoerent lesen . die nu lebent und hernach chunftich sind . daz wir mit unser Erben guetem willen und gunst mit verdachtem muet und mit Gesampter hant zue der zeit do wir ez wol getuen mochten und mit unsers Perchherren hant. dez erbern gaestleichen herren . prueder Giligen zue den zeiten comiteur dez Hauses datz dem Taeutschen haus ze wienne . verchaufft haben unsers rechten Chawfguets daz wir mit einander mit Gesampter hant erarbait und gechaufft haben. unsern weingarten gelegen ze Chlaitzingen. des ein halbs jeuch ist ze nachst hern Perichtolts weingarten dez Pollen . da man von dem egenanten unserm weingarten alle iar dient dem gaestleichen herren datz dem Daeutschen haus ze wienne . fuemf und viertzich wienner phenning ze perchrecht und drei helbling ze voitrecht und nicht mer . Den selben weingarten haben wir Recht und redleich verchaufft und geben . mit alle dem nuetz und rechten als wir in unversprochenleich in perchrechts gewer her pracht haben . umb viertzich phunt wienner phenning . der wir gar und gaentzleich gewert sein . dem erbern Herren hern Jacoben dem Pollen . zue den zeiten Chappelan der Chappellen unser vrowen in der Purger Rathaus ze wienne . hern Otten Haimen saeligen stiftung . der den vorgenanten wein-garten gechaufft hat . zue der selben seiner Chappellen ewichleich da bei ze beleiben . von den sechtzich phunden wienner phenning . die die erber vrowe vrow Gedraut . weiln hern Otten wittibe . der vorgenanten Chappellen stifter . zue der selben Chappellen seiner stiftung geschaft hat . auf der uebertewrung dez Hauses daz si geschaft hat zue unser vrowen Chappellen auf der Stetten ze wienne . da ietzue der newe Chor an dez selben Hauses stat stat . und von den selben phenningen der selb her Jacob der Polle . der vorgenanten siner Chappellen gechaufft het vier phunt gelts . drew phunt gelts auf Efferleins haus dez Juden . daz weiln Hobschleins dez Juden von Judenburch gewesen ist . und leit under den Juden ze Wienne und ain phunt gelts auf dem weingarten der weil Leupolt dez fleischkcher gewesen ist von Medlich . und der da leit ze Engelschalichstorf in den Langen aekchern die man von im abgeloest hat . Und sein auch wir . ich Symon der Viviantz . und ich Katrei sein hausvrowe . und unser erben unverschaidenleich . dez vorgenanten weingarten. dez egenanten hern Jacobs dez Pollen . und aller der . die der egenanten Chappellen nach im Chappelan und verweser sint . und der selben Chappellen in der Purger Rathaus . Recht gewern und scherm fuer alle ansprach . als perchrechtes recht ist und dez Landes recht ze Oesterreich . Waere aber . daz si mit recht an dem selben weingarten . icht chriegs oder ansprach gewunnen . waz si dez schaden nement . das suellen wir in allez aus richten und wider cheren an allen iren schaden . und sullen auch si daz haben auf uns und auf allem unserm Guet daz wir haben in dem Lande ze Oesterreich wir sein lebentich oder tode . Und das diser chawf fuerbas also staet und unzerbrochen beleib . dar ueber so geben wir In disen brief zue einem waren urchuende und ze einer ewigen vestenung diser sache . versigilten mit unserm Insigil . und mit dez vorgenanten Hauses insigil datz dem Taeutschen haus ze wienne . und mit dez erbern Herren Insigil . hern Fridliebs zue den zeiten verweser in gaestlichen sachen in Oesterreich . des hochwuerdigen fuersten Bischof Goetfrids von Pazzawe . und chorherre daselbens und pharrer ze Mauttaren . und mit hern Hainreichs insigil des Straiher zu den zeiten Purgermaister ze wienne . die diser sache gezeug sint mit ieren Insigiln . Der brief ist geben ze Wienne nach Christes gepuerd dreutzehen hundert iar . dar nach in dem sechtzigisten iar . dez naechsten sambstages nach dem Pericht Tage. Den gruntdinst gibt man dem N. Eybenstainer zu Nusdorf und ist an si komen von den tewtschen herren.

Source Fulltext: Peter Peusquens