Ich Jans von den Minnern Pruedern. zu Wienne. und mein erben. vergechen und tuen chunt. mit disem brief allen den. di in sechent. ader hörent lesen di nu lebent. und her nach chomftich werdent. daz wir dem erbern manne Hainreichen dem Vaschanng purger zue Wienne. zue den zeiten Schilter. unsers genaedigen herren. des Hoechgeporn Fuersten Hertzog Ruodolfs zue Oesterreich. zue Steyr. und zue Kernden. und vrawn Katrein seiner hawsfrawe. und ieren erben. ab zue chauffen. und ab zue loessen haben. gegeben. ein halb phunt wienner pheningen gelts ewiges puerchrechts. auf ierem haus. daz gelegen ist. auf der Renngazzen. gegen den Schotten uber. an dem Ekke zunachst hern Ulreichs haus von Hasslawe. umb vier phunt wiener pheningen. der wir gar und gaentzlichen. verricht und gewert sein. als ez der Hertzog gewaltichlichen. allen leuten. armen. und reichen. in der Stat. und vor der Stat. zue Wienn vestichlichen gepoten. und geschafft hat. daz allermaenichlich sulle ablossen. ein ewiges phunt gelts purchrechts. imer mit acht phunten wienner pheningen und nicht tewerr. und des niempt sol wider sein. pei der puezz. fomftzehen phunt Goldes. und sol auch ich vorgenanter Hans von Pruedern. und mein erben. hintze dem egenanten Hainreichen. dem Vaschanngen. und hintze. vrawen Katrein seiner haus-frawen. und hintze. ieren erben. umb daz vorgenant. halbe phunt gelts. auf ierem haus. ader swer daz. egenant ier haus. nach in besitzt. ader inne hat. gantze. und gar. ewichlichen von uns ledich und frey sein. und nimermer dhain ansprach auf dem vorgenanten haus von uns dar umb gewinnen. weder vil nach wenich. und ob fuerbaz. icht brief dar uber her fur chaemen. di sullen alle toed sein. und dhain chrafft nicht mer haben, und des zue uerchund geben wir den brief versigelt mit unserm Insigel. und meins vetern Insigel. herrn Ulreich von Pruedern. und mit des erbern mans Insigel. Fridreichs des Goldslacher. purger zue Wienne. di der sache gezeug sint mit ieren Insigeln. Der brief is gegeben. zue Wienne. nach Christes gepuerd. dreutzechen hundert iar. dar nach in dem sechtzkistem iar. des vreitags nach sand Jacobs Tag, des Heiligen zwelif . poten.

Source Fulltext: Peter Peusquens