Ich Michel der Vierdung, ze den zeiten Statrichter ze Wienne, vergich offenlichen an dem brief daz fuer mich cham in die purgerschrann ze Wienne do ich sas an offem Gericht her Jans von dem Liechtensteg, purger ze Wienn, und chlagt mit vorsprechen hintz vrowen Elspeten, hern Jansen hausvrowe des Uerbetzschen, purger ze Wienn, umb fumftzikch phunt wienner phenning die si im in gesellschaft gelten solde, und chlagt dar umb als verre hintz ier, uentz das im die obgenant vrowe Elspet mit rechten notlaidingen und auch mit vrag und mit uertail gar und gentzlichen dar umb enprast var offem Gericht und ward gevragt was Recht wêr, da ward vervolgt und Ertailt . Es solt der vorgenant her Jans der Uerbetzsch und die obgenant vrowe Elspet sein hausvrowe, vor dem vorgenanten hern Jansen von dem Liechtensteg, umb di fuemftzikch phunt wienner phenning fuerbas ledig vrei und bereubt beleiben vor aller ansprach, und solt ich in des mein urchund geben und solden si mier dar umb mein Recht geben daz habent seu getan Und des ze uerchund so gib ich in den brief versigilt mit meinem Insigil. Der brief ist geben ze Wienn nach Christi gepuerd dreutzehen hundert jar, darnach in dem Sechtzigistem jar, des naesten vreytags nach sand Michels Tag.

Source Fulltext: Peter Peusquens