WIR Hawnolt der Schuechler zue den zeiten Purgermayster und der Rat gemain der stat ze Wienn vergehen offenleichen an disen brief daz fuer den Rat der stat ze wienn choem die Erber vrow vrow Elzpet Stephans witib dez Newnburger dem got gnad und pewerd und pracht vor offen Rat mit Erbern Lewten mit Petreyn und mit Joerigen den Neunburgern dez egenanten Stephans prueder daz sey der obgenant Stephan ier wiert in rechter erhafter notgilt lazzen hiet umb Hundert phunt und Setzzig phunt wienner phenning und die darumb sagten vor offem Rat mit iern Trewn alz si ze recht solten und wand die erhaft notgilt Also vor offen Rat ist beword und pracht Dar umb so geben wir zu einer waren zeugnusse der obgenanten vrown Elzbeten und iren erben disen brief versigilten mit unserm Stat ze wienn anhangundem chlainen Insigil Der brief ist geben ze wienne nach Christes gepurde dreutzehen hundert jar dar nach in dem ayns und Setzigistem iar dez Eritags nach Mitter Vasten.

Source Fulltext: Peter Peusquens