Wir Ruodolf der vierd, von Gots gnaden, Hertzog, ze Oesterreich, ze Steyer, und ze Kernden, Herr ze Krain, ze Portnaw, und auf der Windeschen march, Graf ze Habspurg ze Phirt, und ze Kyburg March Graf ze Purgaw, und Lant Graf ze Elsazz, Tuen kunt, daz wir angesehen haben, gunsteklich den nutz, und frumen, der Chapell ze Ottenhaim, gelegen ze Wyenn, nêbent dem Rathause, und ouch merung Gottes dienstes, die beschehen mugent, von der ordenung, und von dem paw,den der erber, unser getrewer andêchtiger, Jacob der Poll, zuo disen zeiten Chaplan daselbs, getan hat und tuot an derselben Chapell, den wir selber beschawet haben, dar zuo der purgermaister, der Rat, und die gemain unsrer purgern ze Wyenn, gegeben habent, den Kelr, irs Rathauses, und den Ganch und die Durichvart, dabey, und bestêten dieselben gabe, und geben dar zuo und zuo dem paw, und der ordenung der Chapell, unsern willen, und gunst, und wellen daz sey dabey belibe, in aller, der mazze als der prief lautet, den die egenanten unser purger, darueber geben habent, Ouch wellen wir, und setzen, ainer stêten gesetzde, daz der Ganch, und die Durichvart, die der egenante Jacob, der Polle, Chaplan der vorgenanten Chapell, auch gemacht und gelait hat, nebent der Chapell durch, da Merten des Kramer haus gewesen ist fuerbazz eweklich da beleibe, geuebet, und gehalten werden und wellen, und sullen ouch wir, unser prueder, und alle unser erben, des egenanten Chaplans, seiner gesellen, ir nachkomen, und der Chapell, der vorgeschribenen dinge aller rechter scherm sein Mit urchuend ditz priefs. Geben ze Wyenn, an donrstag vor Philippi und Jacobi, der zwelfbotten, do man zalt von Christi gepuert dreutzehen hundert jar, dar nach in dem ain und sechtzgisten jare. Unsers alters, in dem zwai und zwaintzgisten, und unsers gewalts in dem dritten Jaren. + Wir. der. vorgenant. Herzog. Ruodolf. sterken. disen. prief. mit. dirr. underschrift. unser. selbs. hant + Et nos Johannes dei gratia Gurcensis Episcopus, prefati domini nostri ducis primus cancellarius recognovimus prenotata.

Source Fulltext: Peter Peusquens und Camesina in Mitth. des Alterthumsvereines 15, 186.