Universis Christi fidelibus ad quos presentes pervenerint Ludowicus dei gratia sancte Sedis Aquilegensis Patriarcha Isayas eadem gratia Archiepiscopus Sylefriensis. Johannes Gurkcensis. et Bartholomeus Caprolanus eiusdem domini Patriarche in pontificalibus Vicarius generalis. eadem gratia Ecclesiarum Episcopi Salutem in domino sempiternam. Virgo serenissima, gratiarum fons, et virtutum omnium operatrix, tanto devotius, tantoque ferventius est, creaturis omnibus preconiis, et laudibus extollenda, quanto sue humilitatis meritis virgo verbo concipiens, et post partum virgo permanens aput benedictum ventris sui fructum Jhesum Christum super choros angelorum meruit exaltari. Cum itaque ipsa pro nobis advocata nostra aput eundem filium suum iugiter, et sedule interpellet, dignum credimus, ut ad eius honorem, et laudes devotorum, et fidelium animos incitemus, firmam spem, fiduciamque tenentes, quod eius precibus placatum Iudicem piissima exhibebit, Est enim illa Regina, quam prediximus, que sua pulchritudine, et dulcedine, Stellas, Solem, et Lunam superat, et inter cetera resplendet, et que preces suas aput filium suum dominum nostrum ihesum pro nobis peccatoribus cottidie conatur porrigere, a christi fidelibus devotissime honoranda. Intendentes itaque, ut Capella fundata a Strenuis militibus Haymone, et Ottone fratribus, necnon Civibus Wyennensibus, sua in domo Consulum de Wyenna Pataviensis diocesis, edificata et constructa de novo sub vocabulo, et nomine gloriosissime virginis Marie matris christi, quam hodie una cum dictis Archiepiscopo et Episcopis confratribus nostris, et aliis pluribus Ecclesiarum prelatis, in honorem eiusdem beatissime virginis Marie, cum tribus altaribus in eadem edificatis, Primum videlicet, in honorem ipsius beatissime Marie virginis gloriose, Secundum in honorem omnium apostolorum, et Tercium in honorem sancti Leonhardi et Judoci confessorum, et sancte Dorothe virginis sollempniter consecravimus, a christi fidelibus devotissime honoretur, et divinis officiis, et aliis caritatis operibus laudabiliter exerceatur. Et cupientes eciam per spiritualium donorum largiciones, predicta augeri, et felix suscipere incrementum, de omnipotentis dei misericordia, atque predicte beatissime virginis gloriose Marie matris eius. Necnon sanctorum apostolorum, Petri et Pauli, et Hermacore, et Fortunati patronorum nostrorum Omniumque Sanctorum et Sanctarum dei meritis, et intercessione confisi, Omnibus vere penitentibus, et confessis, qui eandem Capellam, et predicta altaria In sollempnitatibus Nativitatis domini, Circumcisionis, Epiphanie, Resurrectionis, Ascensionis dominice, Penthecostes, et Trinitatis, et in quatuor solempnitatibus, predicte gloriose virginis Marie, Et sancti Johannis baptiste, Sancti Michahelis, In festivitatibus omnium apostolorum, Quatuor Evangelistarum, Quatuor sancte matris Ecclesie doctorum, videlicet Ambrosii, Gregorii, Jeronimi, et Augustini, Sanctorum Confessorum Nycolay et Martini, In festivitatibus sanctorum Martirum Stephani, Laurencii, Vincencii, Gervasii, Prothasii, Viti, et Modesti, In festivitatibus sanctarum Marie Magdalene, Katherine, Agnetis, Lucie, Agathe, Cecilie, Elizabeth, Marthe, Dorothee et Ursule, In die consecrationis ipsius, ac in omnibus dominicis per totum Circulum anni, devote visitaverint, ac missis celebrandis ibidem devote interfuerint, Et qui ad dictam Capellam, et predicta altaria, de bonis sibi a domino collatis manus porrexerint adiutrices. Nos Ludowicus Patriarcha predictus unum annum et Quadraginta dies nomine nostro, et nomine Suffraganorum nostrorum, qui sunt XVI numero, scilicet Cumanensis, Mantuanensis, Veronensis, Vicensis, Paduanensis, Tarvisinensis, Tridentinensis, Feltrensis, Cenetensis, Concordiensis, Tergestinensis, Justinopolitanus, seu capitis Ystrie, Parentinensis, Emonensis, seu Civitatis nove, Polensis, Peclenensis, pro singulo ipsorum alios XL. Et nos Ysayas Archiepiscopus predictus Et Johannes ac Bartholomeus Episcopi predicti, singuli nostrum Quadraginta dies, de iniunctis eis penitenciis misericorditer in domino relaxamus, Et omnes indulgencias ante vel primitus ipsi Ecclesie concessas quantum possumus ratificamus et approbamus. In quorum omnium testimonium presentes fieri iussimus nostrorum Sigillorum appensione munitas. Datum Wienne. Pataviensis diocesis. die Quartodecimo mensis Novembris. Anno domini Millesimo Trecentesimo Sexagesimoprimo. Indicione Quartadecima.

Source Fulltext: Peter Peusquens