Godefridus dei gratia Pataviensis Episcopus, universis Christi fidelibus, Salutem in domino ihesu christo. Cupientes quoslibet christiane fidei professores per indulgenciarum premia ad pietatis studia exitare. Et Capellam gloriose virginis Marie, de novo fundatam in Civitate wiennensi, nostre diocese, iuxta domum Ottonis militis wiennensis bone memorie ab eisdem congrua venerari devotione, Omnes et singulas indulgencias et gracias, pro eadem Capella, per venerabiles patres et dominos .. Archiepiscopos et Episcopos concessas, et specialiter per Reverendum in Christo patrem et dominum, dominum Ludwicum Patriarcham Aquilegensem, qui eandem Capellam de nostro beneplacito et consensu consecravit, eidem Capelle largitas, ratas habemus et gratas. Ipsasque auctoritate ordinaria confirmamus. Ceterum omnibus vere penitentibus et confessis ad dictam Capellam, in festivitatibus dictorum patrum et dominorum litteris comprehensis, accedentibus, Quadraginta dies de iniunctis eis penetentiis misericorditer in domino relaxamus. In quorum omnium et singulorum testimonium, presentes appensione Sigilli nostri mandavimus communiri. Datum Wienne, dominica proxima post Conversionem beati Pauli, Anno Domini, Millesimo, Trecentesimo, Sexagesimosecundo.

Source Fulltext: Peter Peusquens