Ich Michel Kirchofer unnd Ich Gabriel Koler die Floetzer, bed Burger ze Wienn dietzeit zech-maister der floetzer hie zue Wienn, Bekennen fuer unns und all unser nachkomen offennlich mit dem Brieve, das unns die Ersamen weisen herren, Laurentz Hüttendorffer dertzeit ainer des Rats der Stat Wienn und Hans Aicher Urtailschreiber und Burger zue Wienn, alls Innhaber und verweser Gemainer Stat Wienn Grundtpuecher, dreissig phund phening guter Lanndesweerung in Oester-reich, so auf Hannsn Rorbacher haws im Ratgêsslein, zunagst weilend Pauln Prachers haws gelêgen, zue hannden bemelter zêch, verschriben gewesn unnd durch den selben Rorbacher zue dem gedachten Grundtpuch erlêgt sein, on allen abgang zu handen bemelter zêch, geraicht gegeben und uberantwort haben. Demnach sagen wir fuer unns unnd all unnser nachkomen zechmaister der floetzer zech die bestimbten hern Huttendorffer und Aicher alls Innhaber unnd Verwêser obemelter Stat Wienn Grundtpuecher unnd al Ir nachkomen, der antzaigten dreissig phund phening gentzlich frey ledig unnd los vor aller ansprach unnd vordrung trewlich unnd ongevêrlich Mit urkunt des Brieffs besigilten mit der Ersamen weisen Hannsn Trünkhl und Hainrichen Frannkh beder Burger zue Wienn zuerugkh aufgedrukhten Insigilln, die wir zue getzewgkhnus der sach mit vleis darumb gebeten haben. Doch In Iren Erben und Insigilln an schaden, Darunder wir unns unnd all unnser nachkomen, mit unnsern trewn bekennen wie an dem Brief geschriben steet. Geben zue Wienn an freitag nach unnsers lieben Herrn Fronleichnams tag, nach Cristi geburde im funftzehenhundertisten unnd dreyzehenden jaren.

Source Fulltext: Peter Peusquens