Wir Karl von gots gnaden Romischer keiser zu allen zeiten merer des Reichs. Wir Wenzela auch von gots gnaden kunig zu Beheim und marggraff zu Brandemburg des itzunt genanten unsers lieben herren und vaters keiser Karls son und wir Johans von derselben gots gnaden marggraff zu Merhern desselben unsres herren des keisers Bruder, veriehen, bekennen und tun kunt allesament offinlich mit diesem brieve allen den, die yn sehen, horen odir lesen nue und hienoch eweclich als wir alle an eyme teile und die hochgeborn hertzog Rudolf, hertzog Albracht und hertzog Lupolt gebrudere hertzogen zu Oesterich zu Steyr und zu Kernden, herren zu Chrayn off der Windeschen Marich und zu Portnow Graven zu Habspurg zu Tyrol zu Phyrt und zu Kyburg Marg-graven zu Purgow und Langraven in Elsazz, und die hochgeborn, Margarethe von Oesterich, der itzgenanten Hertzogen swester wilent Marggravinn zu Brandemburg, Hertzoginn zu Payrn und Grefinn zu Tyrol an deme andern teile. In solicher geschicht davor got sei, ob unsir dweder teil, und des kint, und kindes kint, die wir nuo haben oder hernach gewinnen, abgingen verfuren, ane eliche leiberben, daz desselben teiles land, die also Erblos wurden, gevallen sollen off den andern teil, daz wir die vorg. keiser Karl von Rome, kunig Wentzela von Beheim, und Marggraff Johans von Merhern an unserm teile fuer uns und fuer alle unser erben, und erbes erben ewec-lich, die wir darzu binden, verheizen und globet haben wissentlich mit unsern furstlichen trewen und gnaden, verheizen, und globen ouch vesteclich mit diesem brieve, ob sich daz hie noch in kunftigen tzeiten ummer gefugte, daz durch verhengnuosse des almechtigen gotes in des willen und gewalt alle ding stent, der obg.Hertzog Rudolfs unsers lieben eydems und swagers Hertzogen Albrachtes und Hertzogen Lupolts, Herzogen zu Oesterich und der hochgeborn Margareten yrer swester und ir aller kinde und kindes kinde, erbliche land an uns also gefielen, daz danne wir und alle unser kint und kindes kint, die uns got noch geben mag, und derselben leiberben eweclich alle Stete, Merkt und lantleut die zu denselben yren landen furstentuemen und herscheften gehorent, und die land gemeinlich sullen und wellen bleiben lazzen volleclich und gentzlich bei allen yren gutern, wirden und eren, rechten, freiheiten, gnaden, und guten gewonheiten, die sie von alter gehebt und herbracht habent, und die sie denne zumal an uns bringent, ane alle geverde und argeliste. Mit urkunde ditz brieves versiegelt mit unsern anhangenden Ingesiegeln. Der gegeben ist zu Brunne noch Cristus geburte drutzehenhundert jar darnoch in dem vier und sechtzigestem jare an dem nehsten Mantage vor sant Valentins tag, unsir keiser Karls Reiche in dem achtzenden, und des keisertums in dem nunden jare.

Source Fulltext: Peter Peusquens; siehe auch: Codex dipl. Moraviae 9, S. 261-262, n. 343; Kopie: WStLA Wien, Eisenbuch fol. 66