Ich Swester Kathrey die Mêrinn von Leisse. Ich Swester Margret die Priorinn und wir der Convent gemain datz der Himelporten ze Wienn vergehen offenleich an dem brief das wir von des gepots wegen so der edel hochgeporen fuerst Hertzog Ruedolf ze Oesterreich ze Steyer ze Kernden und ze Krain Graf ze Tyrol selig in der Stat ze Wienn umb puerchrechts abloesung gepoten hat, Recht und redleich ab ze losen geben haben, dem erbern mann Philippen dem Reisenperger puerger ze Wienn und frawen Chlaren seiner hausvrawen, und ier paider erben, ain phunt wienner phenning gelts purchrechts daz wir gehabt haben auf ierm haus gelegen in der Pognerstrass ze Wienn ze nast Jacobs haus des Hawenoltz schreiber, das weiln maister Hertleins des pogner gewesen ist, umb acht phunt wienner phenning der wir gar und gantz verricht und gewert sein. Mit der be-schaidenhait, das wir noch all unser nachchoemen, fuerbas hintz In noch hintz allen iren nach-choemen, di das egenant ier haus nach in inne habent und besitzent, weder mit briefen noch an brief umb das egenant phuent geltz, nimmermer dhain ansprach noch vadrung nicht haben noch gebinnen sullen weder vil noch wenich, wer aber, das fuerbas icht brief fuer pracht wuerden die sagten umb das egenant phunt gelts purchrechts, und daz das obgenant ier Haus da mit anspre-chig wuerd, von swem das wer die selben brief und urchuend sullen aller sach Tod und zenichte sein und dhain chraft nicht enhaben. Und des ze urchuend so geben wir In und allen iern nach-choemen den brief versigelt mit unsern paiden anhangunden Insigeln. Der brief ist geben ze Wienn nach Christi gepuerd drewtzehen huendert jar dar nach in dem fuemf und sechtzigistem jar des nasten Sampstags vor sand Symons und sand Judas Tag der heiligen zwelfpoten.

Source Fulltext: Peter Peusquens