Wir Albrecht von gotes gnaden Hertzog ze Oesterreich, ze Steyr, ze Kernden, und ze Krain, Graf ze Tyrol etc. Bechennen, und tuon chunt, daz wir durch vleizziger bet willen, unsrer getrewn liebsten .. des Purgermaisters .. des Richters, und .. des Rates ze Wienn, und ouch von ettliches gebrestens wegen, der derselben unsrer Stat ze Wienn anligent ist unser purger gemeinlichen, daselbs, ze Wienn, der gewoenlichen steur, die si uns ierlichen raichent, begeben, und si der ledig gelazzen haben von Weihnachten, die schierist choment, zwai ganze iar, nach einander. Also daz si uns, des nechsten Sechs, und Sechtzigisten, und darnach, des Siben, und Sechtzigisten iares, chain Steur, geben sullen, und sagen wir si ouch der, fuer uns, und unsern lieben Brueder Hertzog Leuppolden ledig und los, Si sullen uns aber, in andern unsern nutzen, geholffen, und fuerderlich sein, so si pest mugen. Mit urchund ditz briefs. Geben ze Wienn, an Eritag nach Elizabeth. Anno domini Millesimo Tricentesimo Sexagesimo quinto. marschalcus provincialis et alii de consilio tunc presentes

Source Fulltext: Peter Peusquens